Copa America khelh mekah ram pahnih inel em em Brazil leh Argentina-te chu semi final-ah an inhmachhawn a, Brazil hi si hnih faia chakin kum 2007 hnuah a vawi khat nan Copa America final an lut.

Brazil tan hian Manchester City forward Gabriel Jesus leh Liverpool forward Roberto Firmino-te chuan goal an khunga, an ram chu hnehna an chanpui.

Argentina captain Lionel Messi chuan a ram tan trophy a chawi leh dawn rih lova, a nghah leh rih a ngai dawn.

Brazil 2-0 Argentina

(Jesus 19’, Firmino 71’)

Line Up-

Brazil: Alisson, Alves, Marquinhos, Silva, Sandro, Arthur, Casemiro, Jesus, Coutinho, Everton, Firmino. Subs: Miranda, Willian, Allan.

Argentina: Armani, Foyth, Pezzella, Otamendi, Tagliafico, Paredes, De Paul, Acuna, Messi, Martinez, Aguero. Subs: DI Maria, Lo Celso, Dybala.

Inkhel tan a ni a, team hnihte an intum tawk thawkhat; Argentina hian chance an insiamsak hmasa a, Paredes chuan yard 45 vela hla atangin ball chu Brazil goal lamah chhuihin, Alisson alo awm. Inkhel tan atanga minute 19-naah Brazil hian hma an hruai a, Firmino atanga low-cross lo kal chu changtu nei lo Jesus hian hnai set sawt atangin a lo tlawh lut.

Argentina hian an si phurh sut tumin an bei nasa a, Brazil nawr viau mahse goal an khung hleithei lova, an vanduai tel bawk a tih theih awm e. Brazil-in goal an khung atanga minute sawm vel a ralin Argentine striker Sergio Aguero chuan goal bar a tauh per; Messi chuan freekick atangin Aguero hi ball a pe a, Aguero hian cross-bar a lo tauh per dawt a ni.

Second half-ah Argentina hian bul an tha tha viau a, a tir lamah Lautaro Martinez chuan chance nei mahse Alisson a ti buai lutuk lo. Argentina hian nawr viau mahse Brazil hi counter-attack ah an hlauhawm ve renga, darkar khat khelh a nih dawn velin Coutinho chuan Brazil goal hnihna khungna hun tha tak nei mahse a pet ‘over’.

Messi chuan second half-ah hian goal ban a pet per leh a Argentina hi an vanduai a tih loh theih loh. Messi hian freekick atangin chance a nei leh a, pet chhe lo viau mahse Alisson chuan a lo save. 70mins khelh a ni chho va, Brazil chuan goal an khung belh; Jesus leh Firmino-te bawk in ‘combi’ lehin tun tumah erawh Jesus-a ball pek atangin Firmino chuan awlsam takin goal a khunga, Brazil hi si hnih faiin an chak ta a ni.

Semi final lehlamah Chile leh Peru an intum ve dawn a, naktuk (4/7/19) zing dar rukah inkhel dawnin, Brazil hian final-a an tum tur an hria ang.