Inrinni zan Serie A inkhelah Inter Milan chuan San Siro-ah AS Roma an lo mikhual a, 2-1 in mikhal lam Roma hian hnehna an chang.

Inter hian Federico Dimarco-a goal hmangin hma hruai hmasa mah se, Roma hian Paulo Dybala leh Chris Smalling te goal hmangin mual neitu lam hi an lehthal a, Jose Mourinho leh a nau ten point 3 pawimawh tak an hlawhchhuak.

Roma hian khelh 8 atangin point 16 an hlawhchhuak tawh a, pangnaah an awmin, Inter hian khelh 8-ah point 12 an nei a, pasarihnaah an awm ve thung.

Minute sawm chuang hret an khelhin, Inter hian hma an hruai nghal emaw an ti a, Lautaro Martinez-a pass chu Edin Dzeko-a’n goal-ah lo khung mah se, VAR-a en a nih hnuah offside avangin goal hi sut a ni.

Darkar chanve chiah an khelhin Inter-in goal an khung a, Nico Barella pass chu Dimarco chuan bottom corner-ah a pet lut a, si khat faiin Inter hma a hruaipui.

Inter hian hma an hruai rei lova, goal an khung atanga minute sawm pawh a liam hmain Argentine forward Dybala chuan mawi takin goal a khung a, 1-1 in first half a tawp.

Darkar khat chuang hret an khelhin Inter in hma an hruai leh teuh hle a, mahse Hakan Calhanoglu free kick pet chuan si ban a per. 75mins-ah Roma in an chakna goal an khung a, Lorenzo Pellegrini-a’n free kick atanga ball a vawrh luh chu Manchester United defender hlui Smalling chuan goal-ah lo tauh lutin, 2-1 in Roma hi an chak ta a ni.