RIO DE JANEIRO:
Ka dur jong ka jingkhyrwit ka leilieh ïa u mot jong u Jisu Khrist ba la tip kum u Christ the Redeemer ka la saphriang ha ki social media, kaba la pynpar ñiangkhriat bad pynkyndit ïa ki paidbah ha satlak ka pyrthei.
Ki social media na kylleng ka pyrthei ki la lyngngoh ban ïohi ïa kine ki dur. Ka leilieh ka la khyrwit na khlieh jong u mot ha ka 10 tarik u Rymphang bad pynkylla sha ka dur Blei.
Ïa ka dur jong ka leilieh la thep da u nongpyndonkam Twitter ba kyrteng u Massimo uba la ai nam sha u Fernando Braga namar ka dur kaba pynpar ñiangkhriat. Naduh ba la thep, kane ka dur ka la saphriang bad ki la don 18 milian ngut kiba peit ïa ka.
Une u mot ba jrong 100 phut u don ha ka nongbah Rio De Janeiro ka Brazil bad ki don haduh 2 milian ngut ki briew kiba ju leit peit manla u snem.
