Shillong, Risaw 11
Sa shisien pat u Lionel Messi u dangdon hapdeng ka jingartatien ban sdang ïa ka jingïalehkai na ka bynta ka Argentina ha ka lympung ïaknieh rung World Cup pyrshah ïa ka Paraguay.
Utei u kapten ka Argentina u la ïoh ban thep shi kol na ka bynta ban pynlong ïa ka kynhun jong u ban jop da 1-0 kol ïa ka Ecuador, hynrei u la sangeh ïalehkai ha kaba ar ha kaba ka Argentina ka la jop da 3-0 kol ïa ka Bolivia ha u bnai ba la lah na ka daw ka jingmynsaw ha ki dohksah ha ka jingïakhun na ka bynta ka Inter Miami ha ka MLS.
Kane ka lahduh jong ka World Cup kan ïakynduh pyrshah ïa ka Paraguay ha ka step jong ka sngi Thohdieng ha Buenos Aires.
Ha kawei pat ka liang u Vinicius Jr. u la duh ban ïalehkai ha ki ar tylli ki jingïakhun na ka bynta ka Brazil ha ka lympung ïaknieh jong ka South American (qualifying), hynrei ula wanphai ban sdang ban wanphai sha ka kam ïalehkai hadien ka jingmysaw. Ka Brazil kan ïakhun pyrshah ïa ka Venezuela ha ka step jong ka sngi Thohdieng ha Cuiaba.
Ka Argentina bad ka Brazil ki la kamai mar 6 point ha kane ka lympung ïaknieh jong ka World Cup 2026 hadien ba ki la khur jingjop ha u bnai ba la lah. Kine ki ar tylli ki ri kin ïakynduh pyrshah ha u Naiwieng mynta u snem.
Ka Colombia ka dei ka kynhun kaba la wan ha ka kyrdan balai napdeng ki 10 tylli ki kynhun ha kaba ka la kamai 4 point. Ka Uruguay bad ka Venezuela ki la kamai mar 3 point, ha kaba la bud pat sa ka Paraguay, Peru bad ka Chile kiba la ïoh mar shi point.
Ka Ecuador kam pat shym la lah ban kamai point watla ka la jop da 2-1 kol ïa ka Uruguay ha ka 13 tarik u Nailur. Ka Ecuador ka la sdang ïa kane ka lympung ïaknieh ha kaba ka la shah khate 3 point ha ka FIFA na ka daw ka jingai bakla ïa ka snem kha u rangïalehkai dien u Byron Castillo, uba long trai na Colombia.
Ïa ka World Cup ka ban wan pynlong ha United States, Mexico bad Canada ha kaba yn pyniar haduh 48 tylli ki kynhun, kane ka mut ba haduh hynriew tylli ki kynhun na South America kim ïoh rung sha kane ka lympung.
Kumjuh ha ka step jong ka sngi Thohdieng, ka Colombia kan ïakhun pyrshah ïa ka Uruguay, ka Bolivia ïa ka Ecuador bad ka Chile ïa ka Peru.
