2022 FIFA World Cup chu ngaihnawm takin a tawp ta a hriatreng a ni tawh ngei ang. Qatar thlen intihsiakna hi Sahmulphah thla ni 20 leh Pawltlak thla ni 18 inkar khan neih a ni a, Argentina leh France-te'n a tawp kharin Argentina an dingchang ta zawk.

Qatar World Cup khan sawizui tur sulhnu a hnutchhiah hnem khawp mai a, World Cup awm tawh zawng zawng zinga ropui ber leh hlawhtling ber tia sawitu pawh an tam hle. A tir atanga a tawp thlengin a hmuhnawm a, ka thianpa pakhat phei chuan, 'Final ang vek alawm le' tiin World Cup liamtaa inkhel awm zawng zawng kha a thlir kir.

World Cup khelh zawh takah khan game 64 awmin goal 172 a lut a, sawilan tawh angin a tawpah Argentina an champion. Data analysts Nielsen's Gracenote chuan intihsiaknaa thil thleng zawng zawng kha kim takin an chhinchhiah a, a langsar zual leh kan hriat tlan tura pawimawhte en ho ila.

KUM 64 CHHUNGA BEISEI LOH RESULT TAM BER TUM

2022 World Cup-ah khan rinloh lam chak ta emaw, chak tura beisei loh zawk chak ta emaw a tam khawp mai a, Nielsen's Gracenote chuan match 15-ah hetiang hi a thleng niin an tarlang. A hmasa ber chu Saudi Arabia-in Argentina an hneh kha a ni a, Saudi hian goal an phur teuh ang chu tih laiin hnehna an chang ta daih. Argentina hian Lionel Messi, Angel di Maria, Lautaro Martinez leh Rodrigo de Paul-te an luhtir a, player langsar pawh nei lo Saudi Arabia lakah hian 2-1 in an tlawm.

Morocco-in Round of 16 leh quarter-final-a Spain leh Portugal an hneh pawh kha a langsar khawp mai a, Hakim Ziyech leh Achraf Hakimi bakah chu khawvel hriatsa an nei lo. Croatia pawhin Qatar atangin Brazil an thawn haw a, quarter-final-ah hnehin semi-final an thleng. Inkhel 64 awm zingah khan 24% chu beisei loh result awmna a ni a, Sweden thlen 1958 World Cup (26%) aiin a tlem hret chauh. Chak tura rinloh zawk an chakte khan football mawina a pholang a, World Cup ropui zia a tilang chiang em em bawk.

2018 World Cup-ah khan beisei loh result tia an sawi hi vawi 12 a awm a, South Korea leh Japan inthlen tawm 2002 World Cup-a khan vawi 14 lai a awm thung. 2006 World Cup-ah khan beisei loh result hi inkhel pariatah chiah a awm a, 2010-ah khan 2018 ang bawkin vawi 12 a awm ve bawk a ni.

SHOT A TLEM, GOAL A SUR THUNG

Intihsiakna khelh zawh takah khan shot 1,458 awmin 2002 World Cup hnua shot a awm tlem ber tum a ni a, 2014-ah khan shot vawi 1,661 awmin, tunhnaia World Cup hnuhnung pahnihah a tlahniam. Shot tlem ber tum ni mahse goal erawh a lut hnem viau tho a, sawilan tawh angin goal 172 a lut. Team 32 an tel theih hnua goal a luh hnem ber tum ani ang lawi a, 1998 World Cup-ah khan goal 171 a lut a kuminah goal khatin an khum.

Goal lut zat atanga tehin inkhel tinah khan goal 2.69 lut ang a ni a, United States thlen 1994 World Cup-ah khan 2.71 niin an pha leh teuh hle. Goal khungtu pawh player 117 awmin 2018 World Cup kha player pangain an pha lova, penalty area atanga lut a tam ber bawk. Goal 172 lut zinga 92.9% kha penalty area atanga an thun a ni a, shot awm zawng zawng zinga 62.7% kha box chhunga thleng a ni bawk.

Mahni lama tilut (own goal) pawh vawi hnih kan hmu a kum dang ang bawkin a tam lem lo. A hmasa zawk chu Argentina midfielder Enzo Fernandez tihluh a ni a,Round of 16-a Australia an hmachhawn tumin minute 77-naah a chesual. A hnuhnung zawk chu Morocco centre-back Nayef Aguerd tihluh a ni ve thung a, group stage-a Canada an hneh tumin minute 40-naah a ti goal palh a ni.

TUN KUM ZABIA WORLD CUP FELFAI BER

Hriatreng tawh tur 2022 World Cup-ah khan yellow card vawi 227 phawrh a ni a, 2010 World Cup hnua yellow card tam ber tum a ni nghe nghe. Red Card erawh vawi li chiah phawrh niin Russia World Cup-a an phawrh zat nen a inzat a, kumina an hnawhchhuah hmasak ber chu Wales goalkeeper Wayne Hennessey a ni.

Kum 34 mi hian group stage-a Iran an hmachhawn tumin Mehdi Taremi ati tlu a, minute 86-naah niin refeeree chuan red card a pe. FIFA World Cup-ah hian goalkeeper-in red card an hmu khat khawp mai a vawi thum chiah hnawhchhuah an la tawk. A hmasa ber chu Italy goalkeeper Gianluca Pagliuca niin 1994 World Cup-ah khan a ni a, a vawi hnihna chu 2010 World Cup-ah khan niin South Africa si ban vengtu Itumeleng Khune chu hnawhchhuah a ni a, Hennessey hi a vawi thumna chiah a ni.

World Cup chanchina red card hmu hmasa ber chu Peru player Placido Galindo niin 1930-ah daih tawh khan a ni a, Romania nena an inkhelh tumin World Cup-a red card hmasa ber a hmu. World Cup-a red card hmu hnem ber chu Rigobert Song leh Zinedine Zidane anni a, vawi hnih ve ve hnawhchhuah an tawk. Cameroon centre-back hlui Song hian 1994 leh 1998 World Cup-ah khan red card a hmu a, France midfielder ropui ni thin Zidane hian 1998 leh 2006 World Cup-ah a hmu ve bawk.

Ram mal anga red card hmu tam ber chu Brazil niin vawi 11 an hmu tawh a, World Cup tum khata hnawhchhuah an tam ber tum chu 2006 Germany World Cup kha niin player 28 zet an hnawtchhuak. Red card hmu rang ber chu Uruguay player hlui Jose Batista a ni a, 1986 World Cup-ah niin tan atanga second 58-naah an hnawtchhuak. He inkhelah hian Manchester United boss hlui Sir Alex Ferguson enkawl Scotland an hmachhawn a, hlauhawm taka Gordon Strachan a tih tluk avangin red card pek a ni.

Kan thlah liam tak World Cup-ah khan foul vawi 1,599 a awm a, intihsiakna hnuhnung pali en chuan foul zat hi a tlahniam hret hret. A chhan ber nia lang chu referee-te inkhel enkawl dan a ni a, tul lo leh tangkai loah hamrik a ri khat hle. Penalty pawh vawi 23 awmin, inkhel pakhata penalty 0.36 awm ang zel a ni a, hetah hian final hun pangngai leh extra time-a penalty pawh kha a tel. Video Assistant Referee (VAR) technology an hman tanna 2018 World Cup-ah khan penalty vawi 29 a awm a, VAR an hman hma chiah 2014 World Cup-ah khan vawi 13 chiah a awm thung.

Hun pekbelh chungchang pawh intihsiakna an tan hma khan sawi a tam khawp mai a, thenkhat chuan tunhmaa an kal ang khan kal leh mai an duh. World Cup liamtaah khan chawhrualin inkhel tinah minute 11 zel pekbelh ang anni a, 2018 World Cup-ah khan minute ruk ang zel a ni thung. Hun pekbelh a tam chhan hi inkhelh laklawh laia an hun khawral hnawhkhahna a ni deuh ber a, official hoin anmahni thuin an duh ang zat zat a pekbelh thei lo. Inkhel kaltluang lai hi chhan engemaw vangin a khaihlak fo a, khatianga hun an khawhral zawng zawng kha tun World Cup-ah khan hun pekbelh hmangin an hnawhkhat. Hliam buaipui chhung, VAR rawn chhung, substitution siam chhung, penalty pet chhung leh red card vangte in inkhel a khaihlak tam a, player thenkhat chuan hei hi remchangah lain hun an khawhral lui thin.

PLAYER NAUPANG TAMNA WORLD Cup

World Cup khelh zawh takah khan kum 20 la tling loin inkhel bul an tan tam khawp mai a, World Cup tum khata teenager-in starting XI an chan hnem ber tum a ni.

Kum 20 la tling lo player sawm chuan inkhel 20-ah inkhel bul an tan a, an zingah hian England midfielder kum 19 mi Jude Bellingham, Germany midfielder kum 19 mi Jamal Musiala leh Spain midfielder kum 18 mi Gavi-te pawh tel. France forward Kylian Mbappe hian 2018 World Cup-ah khan teenager ni chungin inkhel parukah inkhel bul a tan a, teenager ni chunga World Cup starting XI chang hnem ber ala ni reng.

KUM UPATE PAWH AN DUAI BIK LO

World Cup liamta khan player naupangte lansarhna a ni bik lova, anni aia upate an chetha zawk mah. Golden Ball dawngtu pawh kum 35 mi Lionel Messi a ni a, Golden Glove hum hawtu pawh kum 30 mi Emiliano Martinez a ni.

Kum 35 chin chung lampangte'n inkhel bul an tan tam ber tum a ni a, kum 35 chin chung lam ni tawh player 27 chuan inkhel 83-ah starting XI an chang. An zinga langsar ber chu Messi leh kum 37 mi Luka Modric anni a, game sarihah ve ve inkhel bul an tan a ni.

A BEHBAWM DANG THLIRKUALNA

Inkhel vawi 64 awmah khan belhkhawmin entu 3,404,252 zet an awm a, chawhrual chuan inkhel pakhata entu 53,191 zel awm ang an ni. Goal khung hnem ber, Golden Boot dawngtu Kylian Mbappe niin vawi riat a pet goal a, khel tha ber hnena an pek thin Golden Ball chu Lionel Messi kutah a awm.

Best Young Player Award leh Golden Glove pawh Argentina lamah kalin Enzo Fernandez leh Emiliano Martinez-te'n an dawng a, England-in Fair Play Award an la ve bawk. Lawmman atan Dollar maktaduai 440 hman ral a ni a kum li liamta ai khan Dollar maktaduai 40-in a tam zawk. Sum dawng hnem ber chu champion team Argentina niin Dollar maktaduai 42 an dawng a, gold medal leh trophy an la tel bawk.

Final-a chak zo ta lo France national team-in Dollar maktaduai 30 an dawng a, pathumna leh palinate'n Dollar maktaduai 27 leh 25 an dawng ve bawk. World Cup khel pha ram hrim hrim khan intihsiak an tan hmain Dollar maktaduai 1.5 an dawng vek a, a hnua an dawn lehte nen chuan intihsiaknaa an tel vang hrim hrim khan Dollar maktaduai kua vel theuh an dawng a ni.

Khawpui pangaa khelmual pariatah khelh niin Lusail Stadium-ah a tawp an khar a, Khalifa International Stadium-in pathumna nih inchuh inkhel an thleng ve bawk. Al Bayt Stadium, Khalifa International Stadium, Al Thumama Stadium leh Ahmad bin Ali Stadium-ah Group A, B, E leh F-te an inkhel a, Lusail Stadium, Stadium 974, Education City Stadium leh Al Janoub Stadium-ah Group C,D,G leh H-te an inkhel ve bawk.

Khelmual an hman zinga lian ber chu Lusail Stadium niin mipui 88,966 an leng a, a te ber chu Al Janoub Stadium niin mi 44,325 an inhnawh leng thei. An hman zinga pakhat Stadium 974 hi thiah tan tawh niin kar hmasa khan an thetdarh tan a, lawng lian ho hman thin bawm lian (shipping container) hmanga siam a ni.

Venhimna lam pawh uluk taka kalpui niin buaina liantham a chhuak lova, intibuai thawm leh chanchin tha lo hriat tur a awm mang lo. A tlem berah ram 13 atangin Police leh Sipai an chahlut a, intihsiakna thlengtu Qatar hian an indaih loh avangin puih an mamawh. Police tir hnem ber chu Turkey niin 3,000 an thawh a, Pakistan-in sipai 4,500 an tirchhuak ve bawk.

2022 FIFA World Cup hi thlasik laia World Cup an neih hmasak ber a ni a, Middle East-in football inkhawmpui lian an thlen hmasak ber ani bawk a ni.