Qatar World Cup-ah Argentina tana goal thun hnem ber leh an captain ni bawk Lionel Messi chuan Croatia laka goal a thun leh avangin Argentina tan World Cup-a goal thun hnem ber a ni leh ta a, goal 11 a thun tling ta. World Cup khelh mekah hian goal 5 a thun tawh bawk.
Argentina in Croatia 3-0 a an hnehna match-ah hian Messi hian penalty-a a goal thun avang hian Qatar World Cup top scorer ni lai Kylian Mbappe chu a nihrual leh ta chiah bawk a. Engpawh nise, Messi hian kum 2022 World Cup-ah hian chanchin ropui tak a hnutchhiah leh ta hrim hrim e.
He goal avang hian Paris Saint-Germain star hian Gabriel Batistuta chu a lehpel ta a, nimahsela hemi lehpel tur hian Messi hian Batistuta aiin a letin game a khel hnem zawk a ni.
Argentina tan World Cup-a Messi goal thun hmasa ber chu kum 2006 kha a ni a, hetah hian Serbia Montenegro chu 6-0 ngawtin an sawp. A goal thun avang hian Argentina tana goal thun thei naupang ber niin hetih lai hian kum 18 a upa chauh a la ni.
Amaherawhchu, World Cup-a goal thun belh leh tur hian kum 8 zet a nghak a, kum 2014 ah erawh chuan Bosnia and Herzegovina, Iran leh goal hnih Nigeria lakah a thun leh ta a, Argentina hi final luhpuiin hnehna erawh an chang zo ta lo.
Kum 2018 World Cup-ah erawh kha chuan goal khat chauh a thun thei thung a, hetah pawh hian group-stage ah Nigeria lakah tho a thun leh.
Kumin World Cup khelh hma hi chuan Argentina tan World Cup-ah goal 6 chauh a la thun avangin Mario Kempes, Diego Maradona, Guillermo Stabile leh Batistuta te hi a chungah an la awm. Qatar World Cup chhung ringawtin anni pali hi a lehpel vek a ni.
World Cup-a Argentina tana goal thun hnemte –
Lionel Messi : 11 (25 games)
Gabriel Batistuta : 10 (12 games)
Guillermo Stabile : 8 (4 games)
Diego Maradona : 8 (21 games)
Mario Kempes : 6 (18 games)
Gonzalo Higuain : 5 (14 games)