Landbouweekblad
Werktuie: Só lyk eerste Nampo-ysters
’n Groot arsenaal nuwe werktuie het skares op die onlangse Nampo-Oesdag buite Bothaville gelok. In die eerste aflewering oor hoogtepunte kom trekkers aan die beurt. Pryse sluit BTW in en is in party gevalle benaderd.
Die Duitse vervaardiger Deutz-Fahr spog met ’n nuwe 6G-reeks trekkers. Die 6175G-model van 126 kW (op die foto) word tans in Suid-Afrika geëvalueer, maar gaan minstens voorlopig nie hier verkrygbaar wees nie. Die modelle wat wel eersdaags hier verkoop gaan word, het ’n vermoë van onderskeidelik 100 kW, 115 kW en 130 kW.PRYS: Die pryse is nog nie vasgestel nie. NAVRAE: Mnr. Cilliers van Zyl, sel 082 926 7054.
Hierdie SmartTouch-armrusbeheerstelsel van Valtra is as die beste ontwerp én as die masjien van die jaar op vanjaar se Agritechnica-werktuigskou in Duitsland aangewys. Dit is standaardtoerusting op die nuwe Valtra S374-trekker en opsioneel op ander modelle. Die trekkerbestuurder kan vooraf verskeie funksies op die beheerstelsel se raakskerm programmeer, soos vierwielaandrywing, outostuur en enjintoere, sodat dit makliker as ooit by die wenakker aan- en afgeskakel kan word. Die S374 van 272 kW is deel van ’n nuwe reeks van vier trekkers wat deur Valtrac van Parys verkoop word.PRYS: R3,91 miljoen. NAVRAE: Mnr. Attie de Villiers, sel 083 261 9863.
Die nuwe Deutz-Fahr 9340 TTV-trekker van Duitsland is deel van ’n nuwe reeks wat plaaslik gebou word, maar slegs dié model word in Suid-Afrika verkoop. Sy SDF-sessilinderenjin van 7,7 liter wek 247 kW op. Die agterste hyser kan 12 ton oplig en die voorste hyser 5 ton.PRYS: R4,14 miljoen. NAVRAE: Mnr. Cilliers van Zyl, sel 082 926 7054.
Claas se nuwe Axion-trekkerreeks bestaan uit drie modelle: Die Axion 800 (150 kW teen R2,645 miljoen), Axion 840 (183 kW teen R2,875 miljoen) en Axion 870 (206 kW teen R3,45 miljoen). Hierdie Duitse trekkers word in ’n Claas-trekkerfabriek in Frankryk vervaardig. Al drie trekkers spog met ’n konstante, wisselende CMATIC-ratkas. Voor op die foto is die 870-model.NAVRAE: Mnr. Michael Howell, sel 083 701 8779.
New Holland se 66010S gaan ’n gedaantewisseling ondergaan met die New Holland S8000-enjin wat die bestaande NEFenjin gaan vervang. Die S8000-enjin bied die 6610S en sy groter boetie, die splinternuwe 7610, meer kraglewering (73 kW vir die 6610S en 83 kW vir die 7610) en groter wringkrag.PRYS: R575 000 (6610S); R638 250 (7610). NAVRAE: Mnr. Ockert Scheepers, sel 082 380 2405.