Sojin Mali 3 da 'yan ta'adda 7 sun mutu a wani fada tsakanin bangarorin biyu

Sanarwar da Rundunar Sojin Mali ta fitar cikin dare ta bayyana cewa an gwabza fada tsakanin dakarun Sojin da ‘yan ta’addan ne jiya talata a garuruwan Mopti da Segou wanda ya kai ga nasarar kisan batagarin 7.

Gwabzawar ta gaba da gaba a jiya na zuwa ne bayan mabanbantan hare-haren sari ka noke da ‘yan ta’addan ke ci gaba da kaiwa dakarun Sojin ta hanyar dasa musu nakiya a kan hanya lamarin da ke haddasa asarar rayuka tarin jami’an tsaron.

Kasar ta Mali na fama da rikicin kusan shekaru 11 ta yadda ‘yan ta’adda da ke ikirarin jihadi ke kwace iko da wasu yankuna tare da farmakar sassan kasar lamarin da ya haddasa asarar rayukan dubunnan mutane ciki har da tarin jami’an tsaro baya ga tilastawa wasu miliyoyi barin muhallansu.